距離中秋還有不夠一個星期,果欄幾乎每日都人頭湧湧,個個趕住買水果送禮。幾時去果欄最好?店家就說星期六、日肯定迫爆,最好都是閒日中午12點-4點,人流相對少一點,睇水果揀貨都容易一些。不過現時果欄部分檔口都已經趕上潮流,可以電話甚至Fb、Whatsapp訂貨再送貨,唔想同人迫,上網都搞得掂。

10大入秋當造水果逐樣睇

果欄水果五花八門,現時哪種當造?點樣揀?即刻同你逐樣睇。

1.最當造!日本青提子

現時行入果欄見得最多的,一定是日本青提,幾乎每檔都有日本岡山晴王、長野香印青提滿滿列陣,事關最近是日本青提子的當造期,而且在當地露天種植的品種相繼出產,無論甜度、賣相、品質,都比早前見市的溫室種較為高,和日本水蜜桃相似,有分特秀及秀的等級。

長野香印提子

以帶花香味見稱,連皮食口感爽脆,賣相圓碌碌像綠色寶石。甜度和日本桃相近,可達13度以上。同一產地,價錢會按串數大小、重量有所不同,最平可以$150有交易,貴一點就大約$230-$250不等。